Neste espazo poderánse consultar as Guías prácticas de feridas publicadas polo Servizo Galego de Saúde ​​​

​

 PRESENTACIÓN

A abordaxe do deterioro da integridade cutánea e tisular implica un problema de saúde de grande magnitude pola perda de calidade de vida das persoas que a padecen, polo impacto que ten nas súas familias e coidadoras/es, e mesmo pola carga de traballo que supoñen os seus coidados para o persoal sanitario. A isto hai que engadirlle o custo económico adicional que supón na a sustentabilidade dos sistemas sanitarios.

O Servizo Galego de Saúde é consciente da importancia e impacto asistencial que ten unha adecuada xestión na prevención e tratamento deste tipo de lesións; polo que considera prioritario continuar traballando neste eido a través do Programa Úlceras Fóra. O mencionado programa galego convertiuse no marco de referencia para desenvolver e establecer as liñas estratéxicas da abordaxe de úlceras cutáneas e feridas, e inclúe como un dos seus obxectivos esenciais o establecemento de criterios asistenciais comúns que permitan avanzar cara á redución da variabilidade clínica na atención deste tipo de lesións.

A Colección de guías prácticas de feridas do Servizo Galego de Saúde incorpora e actualiza asas últimas indicacións baseadas na evidencia científica, recollendo unha síntese das mellores prácticas preventivas e terapéuticas dispoñibles. Cada unha das guías que conforman a colección, ten como obxectivo prioritario dar apoio aos profesionais sanitarios que levan a cabo intervencións destinadas á prevención e aos coidados das úlceras e feridas.

Alfredo José Silva Tojo

Director xeral de Asistencia Sanitaria

Servizo Galego de Saúde